Allah Yahweh cap, nimi cap antamdina ati dona tep pepu upu \p \v 1 Allah Yahwehdi, Musa tep, pepu \p \v 2 Kan adipapu, ne Allah Yahweh si eremna tep, ne cap nimi cap antamdina ati, opkal bol di tenda dodin ati dopkunerume. Ada, war tenpunge kepre taru, awarpu, nungna tenpu tumi deiki di, apepmaken keana tenda opkal bol atipu dopkunerume. \v 3 Adopmum ati neitamaida, Ne Allah Yahwehdi, sun tep, "Angeda ukupkamrume, angeda pio men kupkamrume," pepra pedina upu deiyo peipsisinge, gel pala butene deiki sekeipsi ngeda, co bekin pumbon deipmum ngeda, kandi ange doroprapmemdi, adopmamumnya ati neitamai, Pio Telep Ati pumbonpu bena deipkurume. Ukupmemdi, akati wilimna tep, aupu deipmamumnya urasin tarada, lyom opkal di, gerekra kapkotepmempa, dolopredi aco deikida, kepdongopkurume. \p \v 4 Tonda, adeipmem atida, ne si eremna tep, roti kwaneng derinai tep, tenpu meja betapra deiprumnge cap, nedi peipsisipa ameja deiki deipkamrum keca cap, tonda weica deiyo cap, weica lana tep keteneiprumnge cap, ange yumada, ne Telep Ati pumbon bena deipkurume. Ada, kandi pedina upu co bekin kipra deipmamumnyai dinin, lyom opkal gerekotepmamumnyai atarapu bena dopra deipkurume. \v 5 Tonda, Pio Telep Ati pumbon dinin, ne Allah Yahwehdi, "Angeda kunkamrume, angeda pio men kunkamrume," pepra, pala gel deiki sekeipsisi upu kipra deiprum co bekin, er urasin damai tarapu, siltong pio telep keca uku dongonkamrum keca, er si mesba deipkurume. Ada, ametek mesba, er urasin telep kuna tep, kunumna weik keca emas di dopra amesba nong deiki palepra deiprum ngeda, Musa kandi bena dopra, Pio Telep Ati pumbon deipkurume. Ameja deikida, ne Allah karena tep, siltong pio telep keca uku dongonkamrume. Ukupmemnyopda, ne si eremna ati buplan bisi wengna tep, akati wilimna tep ngeda, lyom opkaldi, deripkotepmempa, kepdongopyopda adeikidi, akati wilipronkamrure. \p \v 6 Ne Allah Yahweh cap, nimi cap antamdina ati, ne si eremna tep ati urasin tarapu, 'Allahdi nun mali kunup keca kaukepra daepkamser' tenen, yapi keca popra yangedi, uku dongona tep, gel pala taplakra yakra deipkamenge. Ada akatipu dinin, bura tarapu er urasin tara deipkamenge. Tonda, akatida pio telep lengnai cadi, er wengbana tep ban bisi buplan damai, lyom opkal di, derimkotemna tep, acapu dopra bena deipkurume. \v 7 Utopu tonda, akati bura tara dinin, ne si eremna tep, yapi keca popra yangedi, uku dongonkamengaida atara, aopkal bol di dondin tenda ati ortara, daneitmai dinin, akati er urasin tarapu, me mau er sida bak, ton bena dopra deipkamrume. Ame mokonda, sun Imam nengdi, sun yan cap, buru cap me kuna tep, aceipu me gwepra yana dingdongonkamrume. \p \v 8 Ukupmemnyopda, ne Allah Yahweh cap, nimi cap antamna tep pio lek ati, urasin dindamai tara dinin, akati dana-dana tara yumada, lyom opkal di, beilya ton deipkamrume. Alyom opkal di, gwatepra ongopdongopmemdi, koupdongopkurume. Tonda, 'Tali nengdi, ne pio lengna ati damai weknung' tenen, akati damai wengbana tep, abeilya buplan wengban bisi peda, lyom opkal di gerekotepmempa, dolopredi, kepdongopkamrure. \p \v 9 Ange yuma konum kupmemnyopda, ne si eremna tep, tenda bol dodina ati konum dopmemnge cap, tonda, adodina ati neitamai deipmamem keca yala yuma capda, 'Akeca yumada, Allah er mawangepu kunkamrure' tenena tep ngeda, peten kemdina tep adipapu minyak saitun me mokon telepnge dopra, akati deiki cap, akati pumbon keca deiki yuma cap, minyak me di likra deipkurume. Ukupkamruma deiki di, ne Allahdi akeca-keca yuma, pio telep kupra deipkamne. Ukupnyopda, akati cap, akati pumbon kupkamre keca yala-yala yuma cap, pio telep lek kecapu kunkamrure. \v 10 Akupmemtopu, ne Allah karena cap, yapi keca popra uku dongona cap tep, gel taplakra yakra keteneipmamumnge, er si mesba cap, tonda akeca damai pel dona tep ketenepra deipmamum pel don keca yala-yala yuma cap, kandi telep minyak me gwepra akeca deiki yuma likra deipkamrume. Ukupkamruma deiyoda, 'Ange yumada, Allah er mawangepu kunkamrure,' tenena tep, apelda dopkamrume. Ukupkamruma deiki di, ne Allahdi akeca-keca yuma, pio telep kudinkamne. Ukupnyopda, amesba cap, amesba pel don keca yala-yala yuma capda, pio telep lek kecapu kunkamrure. \p \v 11 Tonda, akati bura tara deipmamum me mau, sun Imam neng buru cap, yane cap me kuna tep, me deirin keca, er si bak dopra deipmamum me mau cap, er deirinai deiyo keca peda, utopu kupra, 'Akeca yumada, Allah er mawange kunkamrure,' tenena tep, minyak me gwepra akeca deiki likra deipkamrume. Ukupkamruma deiki di, ne Allahdi akeca-keca yumada, pio telep kupra deipnepa, pio lek kecapu kunkamrure. \p \v 12 Apel yuma konum dopmemnyopda, kandi Harun cap, er nyapu cap tep, "Allah Yahweh er si eremna tep lengna ati pumbon neitamai wengna tep, bisi buplan damai beso," pepmempa, sundi acapu yangopda, kandi ketenepra deipmamem me mau damai yangopda, Musa kandi sun yan cap, buru cap, me kupra deipkurume. \v 13 Tonda, kandi Harun tep ngeda, upepkamrume. "Allah Yahweh er lengna ati pumbon neitamai pel talepra dona tep, deiyo ngebo Imam kunkamreme," pepra weipkurume. Ukupmem dingeda, telep minyak me gwepra, Harun er giso deiki likra deipkurume. Ada, 'Allah er ati pel dona deiyo ngebo kunkamra cadi, Allah erngepu kunkamre,' tenena tep, er peten kemna tep, er giso deiki minyak me mokon likeipkamrume. Ukupmemnyopda, Harun erda, ne ati pel talepra donkamre taru, kenengkamre lyom opkal, pio telepnge dopra, er nong deiki kenekra deipkurume. \v 14 Ukupmemnyopda, kandi Harun er nyapu peda, imam pel don neng kunkamenga tep, "Sun deiyo ngebo Harun damai beso," pepmempa, er damai yangopda, kandi, sun aneng peda, imam neng kenengameng lyom opkal, er si kemeja, sun nong deiki kenekeipkurume. \p \v 15 Harun er nyapu yuma tep, kemeja opkal lyomnge Konum kenekeipmem dingeda, sun aneng deiki peda, sun deiyo ngebo Harun, er giso deiki minyak me likra deipmamumtopu, er nyapu yuma peda sun giso deiki minyak me likra deipkurume. Ukupmempa sun peda, ne Allah si eremna ati pumbon neitamai, pel don neng, Imam kunkamenge. Tonda, kandi Harun cap, er nyapu cap tep, minyak me likra derin pel dopmem ngeda, sun anengdi deipmengepa, dadeipdanen bankameng Lewi yala neng yuma peda, ne Allah si eremna ati neitamaida, sun dipapu talepbanmkamenga tep, peten kemdina tep ukupra deipkurume. \v 16 Allah Yahwehdi, Musa tep, "Apel yumada, ukupra-ukupra dopkamrume," peipunge yumada, Musadi aupu peiputo kupra, apel yuma dopu. \s Allah er si eremna tep, opkal ati dopi upu \p \v 17 Amenda taruda, Israel nesala Mesir mutu tapra yanamidi adinen, war tenpunge, tanggal satu deiki di, Musadi peipupa, Israel nesaladi, opkal ati, dodin ati tekra deipi. Akatida, Allah si eremna ati tep, opkal cap, co cap doprapidi, ketenepra deipi. Ataruda, Mesir mutu taprapidi, banmaiyanen, keteng tamun butene tahun konum kupu pangeda, akati tekra deipi. \p \v 18 Musadi Allah si eremna ati, opkal ati dopkami atep, Musadi peipupa apel domi. Akati dela akeca deiki kamkwetepkamre tenen, gat keca doprapidi, ati dela deiyo keca ketenepra tuai deipi. Akeca deiki di, ati dela co ton, sirik-sirikai deipi. Tonda, aco deikida, adine ortara derin co ton deipidi, ayumnya co ton ikra deipi. Ada amenda taru akati opkal, akeca deiki kapkotepkamenga tep, akeca ton keteneipi. \p \v 19 Ange yuma konum keteneipi dingeda, konum keteneipmai pala opkal, atipum ngeda doprapidi, aco deiki galupra deipi. Akati neitamai cap, bura tara cap, yuma dopi dingeda, Allahdi peiputopu, akeca yuma deiki tara, gat opkal ton dopra, galupdongoprapi. Ange yumada, Allahdi Musa tep, Angeda ukupkurume, peiputopu kupu. \p \v 20 Ukupudi Allahdi, Angeda ukunkamrume, peiamu upu doupra, Allah upu gel pala butene deipsekeiamu ngeda, emas di domi bekin pumbon dongopra, buplan dekdongopu. Abuplanda, Allahdi nun mali keca daipserure tenen, emas di keteneipinge tep pepne. Abekine konum ketenepu dingeda, abekine eremna tep, dana-dana tara lyom co dinin, aco deiki emas deipi ngeda, getepdongopudi, erepra Allah si eremna ati, opkal ati neitamai dubena deipu. \p \v 21 Ukupu dingeda, abekin dana-dana yuma, Tali nengdi men epkamenge tenen, peten kemdin opkal, lyom opkal pio telepnge kapkwetepudi, peten kupra deipu. Ange yumada, Allahdi Musa tep Angeda, ukupkurume, peiamutopu kupu. \v 22 Allah si eremna ati, opkal ati pumbon dinin, peten kemdina tep lyom opkal kapkwetepmai opkal bura tarada, Musadi meja tenpu deipu. Adeipu ngeda, akatipum dinin, utara deipu. Allah er si eremna ati neitamai utara deiami bungna keca damai, lyom opkal kapkotemyai deipu. \p \v 23 Allah si eremna ati neitamai meja deipudi, ameja deiki roti kwaneng deipu. Ange peda, Allahdi Musa tep peiputopu kupu. \v 24 Allah si eremna ati neitamai meja deipu ngeda, utara deipu dinin, ameja atara kupupa, itarada dirin kuna tep, weica derin keca deipu. Aweica derinaida, weica weike, yonitam bari akapu. \v 25 Weica derinai konum ketenepudi, Allahdi Musa tep, Angeda, ukupkurume, pepra deiputopu, weica ton deipu. \p \v 26 Ukupu dingeda, Allahdi nun morona upu gekenkamser tenen, metek bekine utopunge dinin, ange deikida, siltong telep keca uku dongorami ngeda, ange ton akati pumbon deipu. Abekinda, emas kunumna weik keca di ketekepi. Akeca derinaida, Allah si eremna ati neitamai dinin, peten kemdina tep lyom opkal kapkwetemaiyai, bura tara acapu deipu. \v 27 Emas bekine deipu dingeda, akeca deiki uku sekrap Musadi nintong telep keca uku dongoramu. Akupu ngeda, Allahdi peiputopu kupu. \p \v 28 Ange konum kupu dingeda, Allah si eremna ati, bura tara dinin, wengbana bisi tep buplanaida, lyom opkal ton kapkwetepu. Ada, Tali nengdi akati pumbon men eptenge tenen, lyom opkal buplanai kapkwetepu. \p \v 29 Ukupu dingeda, Allah si eremna ati damai dinin, bura tara bisi buplan damaida, tenpu keca don deipu. Ada, Mali kupmepepa, nun kaukepkamser tenen, Gam keca popra, dopropnedi bena, akeca deiki uku dongopkamepe tenen, pala gel taplakra yakeipu. Tonda, akeca deiki di, Allah karena tep, gandum jen keca ton dopra, uku dongorami. Ange yumada, Allahdi er tep, Angeda ukupra pel dopkamrume, pepra deiputopu kupu. \p \v 30 Tonda, sun buru cap, yan cap, me kuna tep, yangdina keca ton deipu. Ayangdin keca deipuaida, Allah si eremna ati ortara, gam keca popra uku dongopkaminge tep, pala gel taplakra yakeipuai atara, daneitamaida, buru me kuna tep, yangdina keca deipu. \v 31 Ukwami ngeda, Musa cap, Harun cap, Harun er nyapu cap, sun buru cap, yane cap, me kupnedi akati wengbana tep, ame derin keca aca deipi. \p \v 32 Allah si eremna ati, opkal ati wenbenkoi taru cap, tonda, Allahdi nun mali keca tep kaukepsetue tenen, gam keca popra uku dongoraminge tep, pala gel taplakra yakeipka damai benkoi taru cap, sun buru cap, yane cap me kurami. Ange kuraminge yumada, Allahdi peiputopu kurami. \v 33 Allah si eremna ati, opkal ati cap, gam keca popra uku dongona tep, pala gel taplakra yakeipkai cap, akeca-keca bura tara yumada, lyom opkal dopropudi, beilya utopu kemna tep, kapkwetepudi, wipra ongopdongopu. Ukupu dingeda abeilya buplanaida, lyom opkal ton kapkwetepu. Ukupkopda, Musadi pel dopra gawal daku. Ton cap pel men doramu. Ange yumada, Allahdi peiputopu pel dopu. \s Ila dua di, Allah si eremna ati yuma keprou upu \p \v 34 Allah si eremna ati cap, akati pumbon keca cap, bura tara kwapu keca cap, pel yuma konum dopu pangeda, ila dua kwerepudi, akati yuma keprou. Ton ngeda akati neitamaida, Allah wekupa, er dirin weike kupu. \v 35 Ukupu taruda, Musa peda akati pumbon men wengbenmanto kupu. Deiyoda, ila dua akati kepropa, Allah er dirine weik, akati neitamai wekra kunmaua tepa. \p \v 36 Ataru-ataru yuma, Israel nesala amutu neitamai embarami taru yumada, Allah er si eremna ati, opkal ati deiki di, ila dua welenapu kupupa, sun Israel nesala akati uruprapidi, yukai bena dopi. \v 37 Dinino, ila dua akati deiki men welepu taruda, acapu tupa kunmai. Yukai men embarami. Adua welepu tarupuda, ka di ton, akati uruptaprapidi dopra embarami. \p \v 38 Ange tep ngeda, ataru Israel nesala embandarami taru yumada, keteng komuni taruda, Allahdi ila dua karepupa, akati deiki tara tekamu. Tonda lukunda neitamaida, adua kan-kan di, ila uku bu jeramudi dirine weike kuramu. Akeca yuma tupa kuramupa, Israel nesala yumadi dirami.
