28\s Imam-Imam nang, sik ongolamak butum aling ati nyabuk yupu\p\v 1 Allah arye, Musa biti nyabuk.\p Israel ninye kan-kan arye, andu Harun ap, tonda, el mapu ara, Nadap ap, Habiu ap, Eliasar ap, tonda Itamar ap nirya ati, 'Anang arye Allah ap, ninye ap dukulongona ati, el si erena aik fum tam fil donamak' tenen, ance anang uk wipdeipnamlyame. Winipmimyop ura, sik anang ara, na Allah si erena aik pum tam, na dam mambul fil don nang uk unamake.\v 2 Musa an adip aryuk, na Allah Yahweh si eren aik, fil dona deiyok nang arye omgonamak butum ara, Harun el ongona ati, teleb butum uk wibdeipnamlyame. Winipminyeba, Harun bira abutum ongopliba, ninye nirya eibikirye, 'Elda, Allah si erena aik fil dona deiyoknye ulula ati , elda mambulnye tenen, elti telebe nyabuka kanye delinamake.\p\v 3 Musa ance, butum aling wina ati weik kel nang ak yukubminba yacop ura, ance, sik anang ati nyapmenyeba, sikce na Allah si erena aik fil dona deiyok nang ongonamak butum, Harun el ongona ati wipnamnyake. Narye abutum win nang ati, weik kel ongona deiyok ning akunum aryamsibuk, butum aling fia teleb arye winyake. Ati, ance anang ati, 'Wipnamlume,' nyabuka lak lepdeipminyeba, sik akel nang arye, Harun el ongonamle butum wipnamake. Ara, 'Harun birye Allah el si eren aik fil taliplirye, deiyok koubuka dopninbanamle' tenen, erepdeipnamlum sum ara, Harun birye ongonamle butum wipnamake.\p\v 4 Tonda, ance sik abutum wina kel nang ati nyapminyeba, wibuka kentenipnamak butum ara ani. Tonok ning ara, nong nirya lilina ati, cang butum aling ton wipnamake. Awibikce butum deice ongonamle ning ara, koubuka daralongon ning ton kintinipdeipnamake. Adeice ara, dekna weik keil duk ton, taplakdongobikirye, aning si Efod ton kintinipdeipnamake. Tonda, mitang telep butum arye kemeja ton wipnamake. Tonda, topi kisok kalulamak ning, cang butum aling arye kisok kitina ati, si serban ap, butum deice deiatinga deililamak ning ap, nirya merekeipnamake. Ara, sik Imam nang ongona ati, cang butum aling wibicop ura, andu koproba Harun ap, el mapu ap, sik ongona ati, adip aryuk wibuka kintinipdeipnamake. Winibikiba, sik anang ara, na Allah si eren aik pum tam, nadam yakirye, anyaik talibuka, apil dona deiyok nang unamake. \fig High Priest clothing |picture number|span|28:4|Allah er karena tep ila deiyo ngebo kenengamu opkal|Keluaran 28:4\fig*\p\v 5 Abutun wina ara, sik adip aryuk, butum win tapu si wol tapu, el urasin ara, mirin koprop ning ap, mirin ungu ap, ining bi ning ap arye dobuka wipnamake. Tonda urasin teleb ning, emas deice arye moupmakce butum aling win tapu arye dobuka wipnamake. Tonda, fia teleb mitang butum aling, si lenan, abutum aling wina ati dobuka wipnamake. Allah arye Musa biti nyabuk.\s Allah si eren aik deiyoknye ongonamle ning, Efod ati, 'Winibuka kentenpnamlume nyabuk yupu\p\v 6 Allah arye Musa biti nyabuk.\p Allah el si erena aik pum tam fil dona deiyoknye, el taram deice ongonamle ning, el si Efod ati, winibuka wibuka kentenipnamlume. fia teleb mitang butum aling, el si lenan dobuka, Efod wipnamlume. El urasin teleb una ati, butum aling win tapu, el si wol tapu, el urasin ara, mirin koprop ning ap, mirin ning ungu ap, ining ning ap arye dobuka wipnamake. Tonda urasin teleb ning, emas deice arye moupmakce butum aling win tapu arye dobuka wipnamake. Aning nirya ara, weik kel butum aling wina weik kel nang arye, abutum aling winamake.\v 7 Allah el asik pil dona deiyok nye, taram lilina ati merekenamle ning, el si Efod, aning takunya deice sirya dana-dana ara, tapu welepliba takunya deice koulongona ati, tapu ton kitibuka wipnamake.\p\v 8 Tonda, akintinipmamunye ning, el si Efod, el deiatinga ton wipnamake. Winipnamaka ati, teleb mitang butum aling lenan aryuk, wipnamake. Adeiatinga ap, Efod ap, dukdongobuka tonok atonun winipnamlume. Abutun aling wina ara, anggun adip aryuk, butum aling win tapu, el si wol tapu, el urasin ara, mirin koprop ning ap, mirin ungu ap, ining ning ap arye dobuka wipnamake. Tonda urasin teleb ning, emas deice memelamak butum aling win tapu arye dobuka wipnamake. Tonda, pia teleb mitang butum aling, el si lenan, abutum aling arye winamake. Aning merekeipmunyeba, el urasin tonok uplirye, teleb upnamle.\p\v 9 Efod\f + \fr 28:9 \fq Efod \ft Efod ini ara semacan pakaian yang dipakai oleh Kepala Imam setiap waktu dia masuk ke dalam Bait Suci (Allah el si erena aik), dan diatasnya dia juga pakai satu barang seperti teng yang punya banyak batu berwarna. Kami kurang tahu persis bagaimana dia memakai itu, tetapi dengan pakai itu, dia bisa tahu apakah kehendak Tuhan secara persis.\f* deice taplakuka deipnamlum ning ara, winibuka kintipdeipnamake. Minop ara, urasin fia teleb mirin keil, el si keil delima bitinye dobuka kentinipnulume. Akeil bitinye deice, sik apu koproba Yakop, el si ton ning ara, Israel, elce deiamuk nang, sik si nirya ara, yuk-yuk kibuka akeil deice sekeipnamlume.\v 10 Israel, elce deiamuk nang, sik si nirya, amirin keil deice seknamlum ning ara, minop deiamuknye el si sekuka deipmince, anye bukni aminyan talak deipninyangamuk nang nirya, anggun si ton yuk-yuk sekuka deilinamlume. Aning atonun, dan tam keil deice nakubarye mapu sik si sekminyop ura, otam keil deice sik nakubarye nang aminyan talak deiamuk nang, sik si ton yuk-yuk seknamlume.\v 11 Yakop el si ton ning ara, Israel, elce deiamuk mapu, sik nirya ara 12 nang anya arye, sik si ara, 12 ubuka seknamlum ning ara, dekna weik urasin teleb keil deice, weik kel nang arye, ninye urasin atonun ubuka sekamikce touk ubuka, asi nirya sekenamlume. Asi akunum sekmunyop ura, akeil bitinye dana-dana, dekna weik ning el si emas dobuka, urasin teleb ning el si bingkak arye puturubukabikirye, aning dobuka akeil bitinye sirik tam taplakuka deilinamlume. Winipmimyop ura, urasin fia teleb upnamle.\p\v 12 Akeil bitinye akunum kintinibikcop ura, aning dobuka Efod butum aling takunya deice binuka deilinamlume. Ara, Israel ninye arye, akeil deice seknamlum si nirya eibikirye, 'Se, sik anang ara, nun apu yapu arye deiamikba, dadeipdanin yangalamikba, nun babye dua belas yala nang unyabe' tenen, kel bikinamake. 'Winipnamak' tenen, akeil ap, aEfod ap moupdeipnamlume. Efod akunum kentinipmunyop ura, Harun bira aning ongonamle. Efod ongonamle talak nirya ara, akeil el takunya deice, lakak upliba, sik apu yapu nang si ton lakak upliba eipnyop ura, na Allah Yahweh arye, anggun apu yapu ap, anggun Israel yala ninye nirya ap ati, tuba tenenamsine.\v 13 Yuk ning bitinye ton, urasin teleb dekna weik kurun ning, emas arye kwatibuka deipmakce ning ton dopropnamnyake. Dopropbikirye, aemas arye urasin teleb ning, el si bingkai puturubuka kentenipnamlume.\p\v 14 Tonda, dekna weik kurun ning emas ton dobuka, kurun tapu rantai bitinye ton merekeipnamlume. Aning ara, basam turya bolamaka urasin atonun ubuka, merekeipnamlume. Arantai emas tapu akunum kentenipminyop ura, arantai bitinye dobuka, urasin teleb ning el si bingkai deice taplakuka deipmince, aEfod ara mulaca yok deice wibuka dukdopnamlume.\s Yahweh el aik fil dona deiyoknye, Imam kouku dam ongona butum aling ati nyabuk yupu\p\v 15 Allah el si erena aik, fil dona nang, anggun deiyoknye bira, 'Allah el tenelye ning uk, moubuka kekepnirye kel biknamne tenen, unamle talak nirya ara, aning kel bikna deiyok ning ton, weik kel nang arye kintipdeipnamake. Ara, Efod butum aling ara taram dam ongonamle butum aling kintinipdeipmamunye touk, aning babye atonun ubuka wipnamlume. Ara, abutum aling wina ara, anggun adip aryuk, butum aling win tapu, el si wol tapu, el urasin ara, mirin koprop ning ap, mirin ungu ap, ining ning ap arye dobuka wipnamake. Tonda, urasin teleb ning, emas deice arye moupmakce butum aling win tapu arye dobuka wipnamake. Tonda, fia teleb mitang butum aling, el si lenan, abutum aling wina ati dobuka wipnamake. Winipminyop ura, taram dam ongonamle ning ap, Efod butum aling ap, urasin fia teleb ning aryuk dobuka moupnamlyame. Aning ara Efod deice birilkwetenamle.\p\v 16 Allah tenelye ning kel bikna ati melin ning ara, teleb lenan butum aling dobuka, kup-kup kintinideipmunce, wipnumunyop ura, dana-dana yuk-yuk, bitinye kwanidongbuka deipnulyame. Akunum winipmunyop ura, abutum aling el cang ap, el pala ap ara, yuk-yuk bukni, atonun uk 22 sentimeter uk dekuka kentinipnulume.\v 17 Winibuka deipmunyop ura, urasin pia teleb keil dobuka, yuk-yuk bukni, lelebukapmunce nebuka, dum barye deice arye, taram dam ongona butum aling deice kentinipnulume. Ara, nebuka deilina tonok taplakuka deipnamlum keil ara, leng-leng nyaplirye, mereng nyalamle keil, el si delima merah ap, topas ap, tonda baiduri ap, dobuka lelepdeipmunce memepdeipnamlume.\p\v 18 Aning deice lelelina bitinye ning deilina ati keil ara, Zamrud ap, Nilam ap, Intan ap arye, deibuka taplakuka memepdeipnamlume.\v 19 Aning deice lelelina winilye deilina ati keil ara, Lazuardi ap, Akya ap, Kecubung keil ap, arye, deipmunce, taplakuka memepdeipnamlume.\v 20 Nelina dumbarye ning, tablakalina ati keil ara, Pirus ap, Yakut ap, Ratna Cempaka ap, palipdeipmunce kentinipnamlume. Urasin teleb o barye keil dana-dana nirya ara, dekna weik kat ning el si emas arye dobuka, aning el si bingkai puturupdeipmunce memepdeipnamlume.\p\v 21 Aurasin teleb keil, o barye (12) deice nirya ara, Yakop, el si ton ning ara, Israel, elce deiamuk nang, anang sik si yuk-yuk sekipnamlume. Tonye biti ara el si ton keil deice, tonye biti ara el si yuk keil deice sekmince, winibuka sekninbanmaminya ani, sirya daknalame. Ara, Israel ninye arye, akeil deice seknamlum si nirya eibikirye, 'Se, sik anang ara, nun apu yapu arye deiamikba, dadeipdanin yangalamikba, nunda a obarye yala nang uk unyabe' tenen, kel biknamak atia.\v 22 Tonda, kouku dam lelildongon ati ongonamak butum aling kitina ati, urasin teleb ning emas arye dobuka rantai tapu bitinye kentenipnamlume. Arantai memena ati ara, basam turya tapu bolamak to nun ubuka, bopmince kentinipnamlume.\p\v 23 Winipmunyop ura, aning bitinye ara kouku lilina ati, ongon butum aling akunum kintinipmunyop ura, aning kitina ati ara, dekna weik teleb ning emas deice arye, cincin atonun ning, tupne atonun kibuka wipmunce ongobuka memepdeipnamlume. Winipmunyop ura, kouke deice ongonamle butum aling, itam sirya dana-dana bitinye ara, wibuka deipnamlume.\v 24 Winipmunyop ura, dekna weik ning emas arye akunum kintinipnamlum rantai tapu bitinye dobuka, emas deice arye cincin ato ning, tupne ongobuka wipmunce, aning atonun kibuka memepmamunye ning, taram deice ongonamle ning bukni, deice tam sirik tam wipmunye ning ara, kat tapu el si rantai tapu arye dukdopnamlume. Acincin kintinipmamunye bisik uk, arantai binuka dongobuka deipnamlume. Ara taram deice kiniknamalye ning, sirya dana-dana deice tam binuka dongopdeipnalame.\p\v 25 Tonda, arantai tapu sirya yuk tam ning ara, Efod butum aling akunum kintinipmamunye ning ara, takunya deice emas ning arye wibuka deipmamunye sukum uk, arantai tapu ara koupdongopnamlume. Ara, Efod urasin tam koupdongopnalame. Winipmunyeba taram dam lilina ati ongolamak butum aling, mitik tonun teng atonun ning ara, balye tam arye lapkwetebuka, taram tam yan dukdongopnamlume.\v 26 Tonda, urasin teleb ning emas deice arye cincin ato ning bitinye wipnamlume. Wipminye ura, kouku lilina ati butum aling wipmamunye taram tam, wipnamlame. Ara, Efod butum aling upmalye sukum uk deipnamlyame.\p\v 27 Aning nirya akunum winipminye ura, urasin teleb ning emas deice arye, cincin atonun ning, tupne dam ongopdongobuka wilamak to, bitinye wipnulyame. Awipmunye ning ara, Efod butum aling mulaca yok deice kintinipmamunye mirin keil bitinye ning ara, aning amutam wipnamlame. Ara emas tapu bitinye kintinipmunye ning ara, el koulongona ati, amutam yan koupdongopnamlyame. Winipminyop ura, Efod butum aling taram tam bukni, deiyatinga dukuldongonak itam libuka dukdongopnalyame. Ara taram deice lelipnamle ning koulongona ati, mirin koprop tapu arye, dukuldongon amutam yan dukdongobuka deipnulyame.\p\v 28 Winipnalama deiyok ara ani. Ara, kouku daralongona ati emas cincin amutam ning ara, adip aryuk mirin koprop tapu arye, Efod butum aling emas cincin kirikdongopnaminye sukum uk libuka dukdongopnalyame. Winipmunyop ura, atapu arye, Imamnye ongonamle deiatinga binuka dukdongobuka deipnalyame. Winipmunyeba, taram dam lililongona ati abutum aling deice, keil 12 taplakdeipnamlum ning ara, deiatinga itam kipnamle anya arye, 'Taram deice uk tuba aupnamle ning ara, kwiribuka kum saknamle tenen, winipnamlume.\p\v 29 Atalak-atalak nirya, Harun bira, Allah el si erena ati, Teleb Asik\f + \fr 28:29 \fq Teleb Asik \ft Anggun moubuka biknamlulume atenda aik fum tam ara sung-sunga fia kum aik ara ol bitinye aubuke. Tonok ning ara din delin meija ap wisa laning el si ara "Teleb Aik", asukum ara fum weik aik ati telep gorden arye lalkwetelamik. Tonda, anye aik fum tam ara gorden arye lilyamik, buk danganbuka lum tam, anyaik otam bitinya aik fum el si ara "Fia Teleb Aik", asukum ara Allah ati arelbanamle. Wekelyanganamle talak nirya ara, Harun adip aryuk, Israel yala nang, sik si sekuka deiamice keil ara, el taram deice ongonamle butum aling ongoplirye, anyaik wekelbanamle. Abutun aling deice arye, 'Allah el tenelye ning moubuka tenipnirye, kel bikinamne tenen, ongonamle. Winibuka, anyaik weklyop ura, na Allah Yahweh arye, sik 12 yala nang, sik si nirya eipnyop ura, sik Israel ninye ati, Sikda, na mapu koprop unyake tenipnirye, tuba tenenamle.\p\v 30 Tonda, Harun bira Teleb Aik Wekelyanganamle talak ara, na Allah Yahweh dam atonun yanganamle anya arye, el kouku dam lilina ati ongon butum aling taram tam ara, Urim\f + \fr 28:30 \fq Urim \ft Aning ara nun wal-wal bukni abitinye keil duk wininyak ning, nun bikinyab ara, Yahweh arye menop talak Allah Yahweh arye winipnamne teinyamne ning ara Imam nang ak lak nyalilamuk. - Winipmanto ara, Alkitab BIS bisik dipdelulume ap, Tumim ap, deiplirye, wekelbanamle. Aning bitinye ning ara, el taram deice lelipnamle butum aling, amutam bukni, el bitim deice, el talim dam deipnamle. Winibuka yalye ura, Harun elda, 'E, Allah arye nun Israel ninye ati, aning winiptinge, aning kum winiptinge tenen, moubuka kel biknamlule. Kel biklirye, Israel ninye ati, lak nyalbanamle.\s "Na aik fril dona ati, Imam nang butum aling yuk ning ton wiplulume," nyabuk yupu\p\v 31 Na aik fum tam fil dona deiyok nang ati ongonamle cang butum aling, ara Efod amutam ongonamle ning ara, acang butum aling memena ati ara, wol tapu el urasin ara mirin koprop ning arye dobuka wipnamlume. [\add FN Imam nang ongolamak butum aling ara: yuma ara taruk jang butum kurun aling, bitinye ning ara dolkweten jang kiri bola, winilye ning ara Efod yang kiri bola - ungu- ining bol - kurun, arye itam ara, taram deice ongolamuk ning ap 12 keil ara.\v 32 Acang butum aling mirin koprop ning ara, el kum dam ara, butum aling bola kat ning arye, deipdongobuka wipdongopminyeba, daralbikya deice arye, minop kum delekmanto unamle.\v 33 Winipmunce, acang butum aling mirin koprop ning ara, kup-kup utam nirya ara, urasin teleb una ati adip aryuk, wol tapu el urasin ara, mirin mirin ning ap, ungu tuah ning ap, ining ning ap arye, yo duk el si delima, yo duk moulamle tonun ubuka, wipnamlame. Winipminyop ura, kat ning emas arye, mitik lelim lelamle ning, el si geling-geling ton memebuka kirikkwetepra binamlume.\p\v 34 Winipmunye talak ara, acang butum aling mirin koprop ning, kup-kup utam nirya ara, minop yo duk delima atonun ning wibuka deipmunyop ura, aminyan lo upmalyak ara lelim lelamle ning, geling-geling memepmamunye ning kiriknamlulune. Aning atonun ubuka, aning bitinye wipmunce, abutum aling sirik tam nirya, kirikdongopmunce, angnabuka kirikdongopnamlume.\v 35 Acang butum aling mirin wisi ning ara, Harun el Imam fil donamalye talak nirya ara, adip aryuk ongonamle. Tonda, Harun bira, na Allah Yahweh dam, na Teleb Aik yan wekuka fil donapnilye ati, wekelyanulye talak babye, tonda yan fil donmalya ane, binulye talak babye, Harun el cang butum aling utam sirya dolopkwejamice ning, el si geling-geling arye, binuka lelim leplye ura, na kekepnamne. Aning kekepnyop ura, Harun kum dipnamle. Aning kum winiplyop ura, Harun dipnamla anya arye. Ati ara, 'Harun el anyaik, Teleb Aik fum tam fil donmalye talak ara, Allah Yahweh el dam unamalula anya arye, Harun diplyak tenena ati, acang butum aling mirin koprop ning, lelim len ning geling-geling kirikdongobuka, dolopdeipnamlum ning ara, pia ongonamlule. Aning kum bataknamlule.\p\v 36 Tonda, urasin teleb dekna weik ning, emas deice arye, miti yo lase atonun ning kentenipnamlume. Aning deice arye, meterai atonun ning ubuka, anyapnukin yupu sekuka, laka kipdeipnulyame. Ayupu ara ani. 'Allah Yahweh, an na tenen ning, fia teleb ulule nyabuka sekeipnamlume. Aning deiyok ara, 'Aning ongonamlanye bira, Allah el ning uk ulule. Tonda, malye ning tonok babye kum upmalibuk, fia teleb uk ulule, tenen, aemas ning deice arye, ayupu laka kibuka sekeipnamlume.\v 37 Aning nirya akunum ongopminyop ura, kisok kalun ning ara, mirin kira bola tapu arye, Harun el kisok deice ongonamle cang butum aling, urasin tam uk koupdongopnamlume.\p\v 38 Tonda, urasin teleb ning, emas arye laka ongon ati, anyapmakin yupu sekuka deipmunce, Harun bira, anyaik fil donamle talak nirya ara, el kisok\ deice koupdongopnamle ning, el si serban taram tam, koupdongobikcop ura, aning fia ongonamle. Ayupu sekuka moupdeipmamunye ning ara, Harun el kisok kalulamak bukni, el asok deice tam deilinamlume. Winibuka deiplyop ura, anggun Israel ninye arye malye wininyak ning deiyok ara, el Harun deice winipnamlume. Ara, Israel ninye arye, 'Allah arye nun malye unyap ning naminkipsilirye, lyepnamsil tenen, kam un ning obuka nati arelyanganam ninyak ning, aning-aning weik aupnamle bukni, anggun malye wining deiyok ara, Harun el deice uk deipniba, aupnamle.\p Ati ara, laka kina ati, emas deice amambul yupu sekuka deipminba, Harun el kisok deice ongonamle ning ara, na Allah Yahweh, ayupu eipnirye, anggun nirya ati, 'Telebe, Israel ninye anggun malye ning kum kipdeipnam narya. Ati, na dam yatinge,' tenenamle. Tonda, adeice arye anggun Israel ninye malye unyak ning aupmalibuk, teleb aren ning na Allah Yahweh dam arelyanamnulum ning nirya babye, 'Telebe,' tenipnirye dolonamne.\p\v 39 Harun el nong dam ongonamle kemeja butum aling ara, cang ning butum aling lenan urasin teleb ning arye wibuka kentenipnamlume. Tonda, aning atonun, el kisok kalun ning, el si serban topi babye, mitang teleb butum aling lenan ning arye wibuka memepdeipnamlume. El deiatinga ara, butum aling wina weik kelnye biryuk, urasin teleb ning arye wipnamle.\v 40 Aning atonun, Harun el mapu babye, sik ongon ati kemeja butum aling ap, deiatinga deilina ap, tonda kisok koulongon butum aling ap, moubuka kentinipnamlume. Winipmunyeba, Israel ninye anang eibikcop ura, 'Se, sik anang babye, mambul fil don nang ton unmake,' tenebikirye, anang ati telebe nyabuka si erenamake.\p\v 41 Abutum aling ara, an kwit Harun ap, el mapu ap, sikti ongopdeipnulyame. Akunum ongopdeipminyop ura, minyak saitun yo duk mek dobuka, sik yuk-yuk bukni, sik kisok deice dikeipnulyame. Winipminya deice arye, sik anang wipdeipminba, na si erena aik noutam talibuka, fil dona ati, Imam nang unamake. Tonda, winipminya deice arye, sik anang ati teleb kilinamlyame. Winipminyop ura, na Allah dam yatingce, na si erena aik pum tam fil talibuka doptinge.\v 42 Tonda, sik anang ongon ati, sik na tenen ongonamak butum aling atonun ning wipnumunyop ura, (mitik tonun arye celana dalam cang ning atonun ning ara), kain lenan dobuka wipmunce, kentinibuka deipnamlume. Abumang celana el cang ara, der dam arye dipdongobuka, keil dam binuka deibuka kipnamle anya arye, aning atonun ubuka, miti cang arye wipnamlume, Winibuka wipmunyeba, ongonamak talak ara, anyaik fum fil donmakce talak, weik kipmanto ning ara, lelilongonamle.\p\v 43 Sik, aImam nang ara, na Allah si erena ati aik ara, na aren ning uku dandam binukce talak ap, na Allah kurun aik noutam bukni, anyaik si Teleb Aik binukce talak ap ara, aning na tenen butum aling uk ongobuka binamnyake. Amu butum aling kum ongobikcop ura, malye una deiyok ning, sik nong deice tuba aupmalibuk, elce sikti wenebuka opnamne.\p Ura, na Allah arye, 'Abutum aling ongopnamake,' nyapdeipmakin yupu nirya ara, Harun ap, el mapu ap, sikce fia wininamake. Tonda, sik deibikiba, dadeipdanin banamak nang nirya babye, na aik fum tam fil don talak nirya ara, aning uk talibuka, pia upninbanamke. Atalak arye dipdongobuka, dounamle keteng tamun noutam nirya ara, Israel ninye arye ayupu pia kum bataknamake.\p Allah arye Musa biti ayupu nirya lak nyabuk.
